Äs isch für Trachtägruppä Unteribrig ä grossi Ehr und Freud nach 10 Jahr wieder ä Älplerchilbi dörfä z'organisierä.

Underem Motto „Ybriger Brauchtum“ heissid mier alli Lüüt und Trachtäfründä rächt härzlich willkommä.

Über 30 Gruppä us Trachtälüüt, Jodler, Musiker, Trychler, Buurälüüt, Jäger, Holzer und nu vill meh usem Ybrig und dä umliegendä Dörfli sind bestrebt, ihri schöünä Trachtächleider, Volkstänz und s'Bruchtum z'hüetä, z'pflägä und au wyter z'gäh.

Äs isch scho schier ä alti Tradition, das alles amänä buntä und farbäprächtigä Umzug durs Dorf „Üch“ dörfä z'zeigä.

Äs sehr motivierts OK,  vili Verein und Einzelpersonä vom Ybrig und us dä Region sind flissig dra, äs schöüns Fäscht, ä kulturellä, gsellschaftlichä und unvergässlichä Tag uf d'Bei z'stellä.

Chömid Sie is Ybrig und erläbid, was üses Tal a Gaschtfründschaft und Härzlichkeit z'bietä hed.

Mier freuid üs, wenn Sie üsä Fäschtalass bsuechid und dankid Ihnä härzlich für Ihri grosszügigi Unterstützig.

Dr OK-Presidänt

Sepp Immoos